Tag Archives: scaf

مسؤولية

مر اسبوع على مذبحة ماسبيرو

كنت برة مصر وقت الاحداث ومن يوميها لحد دالوقتي مش قادرة اتغلب على الصدمة، مش صدمة ان المجلس العسكري متوحش وممكن يرتكب جريمة بشعة زي دي ضد مدنيين، ومش عشان فهمت قد ايه المجلس العسكري متورط في الخراء ومتأكد ان لو النظام وقع بجد هيروحوا في ستين داهية. كل ده متوقع ومش مفاجىء أوي بالنسبة لي.

اللي مش قادرة استوعبه هو ازاي الناس اللي انا بقالي 25 سنة عايشة في وسطهم وبركب مواصلات معاهم وبروح مدارس وياهم وبستلف منهم ملح ممكن يشاركو في ده، مش قادرة افهم ايه اللي الجنود المصريين اتعرضوله عشان لاي سبب يرضوا يفعصوا بشر زيهم بالمدرعات ويرموا جثثهم في النيل! ايه اللي المواطنين الشرفاء اتعلموه عشان ينزلوا من بيوتهم بسيوف يدافعوا عن جيشهم من مواطنين زيهم عزل؟ وايه اللي البني ادمين رضعوه يخليهم يعلقوا على صور الشهداء بكلام زي احسن ويستاهلوا والى الجحيم. بجد هتجنن مش قادرة اصدق!

محدش يقولي جهل وتخلف، انا ساذجة ومش قادرة اصدق ان سنين القهر خلت اهل البلد حيوانات، فقدوا الانسانية وتحولوا لقتلة. بقعد اسرح وتخيل ان في راجل كان قاعد بيتعشى في بيتهم مع مراته وعيالة واول ماشاف الاخبار في التلفزيون المصري قام واخد السيف نازل يموت بني ادمين!

دالوقتي الثورة جالها اكتئاب والكل محتار يبتدي منين، ازاي وهل نقدر نرجع انسانية الناس اللي راحت؟ ازاي نقدر نتغلب على سنين وسنين من الشحن الطائفي اللي يخلي الناس تتمنى لبعض الموت؟ للأسف مانقدرش في يوم وليلة ودي معركة طويلة هتاخد سنين. بس اللي نقدر نعمله هو اننا نستمر.

العسكر لازم يمشي ولازم يتحاسب

طنطاوي وعنان وبدين مجرمين حرب ولازم يتحولوا لمحاكم دولية

ماسبيرو لازم يتطهر

كل مرة اجي استمتع بأكلة او مزيكا او فستان جديد هفتكر قد ايه الحياة غالية وان مينا اتسرقت منه حياته غدر وانه كان لازم دالوقتي يبقى مع عيلته بيخطط لمستقبل حياته مش عبارة عن صورة ومقالة وجرافيتي على الحيطان!

مينا ضحى بحياته الغالية عشان احنا نكمل الثورة

يالا نبقى قد المسؤولية

Advertisements