لو تروح و تقول مسافر ,مين يسأل علينا

 هي:

أيوة و اقعد أحاسب نفسي, مش عارفة أزاي بيقولوا ان اللي معندوش رب يحاسبه هايعيش مرتاح,مفيش أصعب من حساب النفس

أيوة, أنانية,طول عمري فعلاً أنانية,و عايزة العالم يدور حوليا,اتكلم عن جراحي و الكل يسمع,واالي عايز يفضفضلي مش هيلاقيني,أنا مشغولة,عندي جراح ,بس اه لو يعرفوا ..

أيوة طماعة, مبكتفيش بأي حاجة عندي, عايزة ابقى اله,الجمال و الحب و الحرب و البحر و السما و الطب و الحنان,عايزة كل حاجة ,ناس حواليا لما أبقى و حيدة, أبقى نفرية و وحدانية لما يبقى طالع عليا عفريت الأستقلال, و طبعاً مليش دعوة الناس محتاجة ايه…بس هو مين مش طماع,مين مش عايز كل حاجة

أيوة مستغلة, بستغل كل حد و أي حد, بستغله و أنا و حيدة و ضعيفة و أرميه و أنا شبعانة و قوية,

و أطلب من الجميع انهم يفهموا و يعذروا و يقدروا جروحي, قد ايه أنا مجروحة

بس آه لو تعرفوا..

النهردة , أنا عارفة يعني ايه ابقى خايفة على حد يتجرح,حد أضعف,حد أصغر,حد أحلى, لازم أختار اني مبقاش أنا سبب الجرح

لازم أبعد …و عمري ماهنسى

إن في رحلتي الطويلة للبحث عن الحب, هي اللحظات الصغيرة دي اللي عمرها مهتتنسي و أني يوم مهفقد الأمل في الحب المطلق العنيف اللي بيخلي الناس يعدوا لياليهم الطويلة الحزينة, هفتكر الكام لحظة دول,الكام لمسة دول,الكام عين دول,و هكمل..

كفاية عليكي كدة, متبقيش طماعة,متبقيش أنانية و مستغلة,الحب برضه لازم يتوزع بالتساوي على الناس , و برضه لازم يبقى فيه تكافؤ فرص,

 كفاية عليكي كده,يا طماعة