عن الأطفال والمكان الأحسن

في اكتر الفترات سواد في حياتي كنت دايماً بلجأ للي أنا عارفة كويس أنهم بيدوني أمل

من سنتين وكانت الدنيا ضاقت خالص مبقلهاش مخرج  أشتغلت في مركز للأطفال العاملين مدرسة انجليزي, المركز كان في منطقة عمري ماسمعت عنها قبل كدة “المنيب” . المنطقة البعيدة قوي عن بيتي و عن حياتي

الأطفال و كالعادة أدوني سبب في وقت مكنش فيه اي أسباب تخليني أقوم من السرير. لسه فاكرة أول مرة دخلت فيها الفصل و دخلت معايا صاحبتي اللي بتشتغل هناك تعرفني عليهم وتلفت نظري أن الكل مستحمي النهردة عشان هيقابلوا أبلة الأنجليزي. قاعدين جنب بعض و عنيهم بتلمع ذكاء , أفتكرت كلام أمي أن الأطفال المصريين معدل ذكائهم عالي جداً و أنه بتدهور مع دخولهم المدرسة, عشرين جوز عيون بصنلي و مبحلقين منهم اللي بيتفرج و التاني اللي خايف, مش عارفين أني كنت مرعوبة أكتر منهم و بحضر لليوم ده من زمان. قلعت الخمس حلقان و الخواتم و لميت شعري و حاولت أظهر بالنسبالهم بنت عادية من كوكب الأرض و من سكان أم الدنيا

Good Afternoon Students

صمت

طيب مساء الخير

مسساء النوووور يا أبلة …؟

 قلت أسمي و أنا بفتكر الأغنية اللي كان بيغنيها العيال اللي معايا في المدرسة عشان يغيظوني و اتوقعت أن الأطفال العاملين هينفجروا من الضحك و يغنوها

بس محصلشي, اللي حصل أنهم كلهم أبتسامة واسعة تطمني (و أنا اللي المفروض أطمنهم)

  الفصل ضيق فيه تقريباً 20 بنت وولد أعمارهم ما بين 6 ل 12 سنة كلهم معرفتهم بالأنجليزي متساوية , حتى اللي منهم كان في fine , thanks    يبقر رده/ ردها what’s your name? أعدادي كنت لمى أسأل 

سألتهم عن أزاي بينجحوا في الأمتحان كل السنين من أولى ابتدائي ل 2 أعدادي و أكتشفت أنهم بيعرفوا يكتبوا الحروف الأبجدية الأنجليزية و بتملوا الأجابات و بتبقى كتابتهم بالشكل ده

mynameissamira

ابتدينا مع بعض من الأول خالص, الأبجدية الأنجليزية, فرحت أوي في تاني حصة لمى لقيت 12 منهم عاملين الواجب و حتى محمد أصغر واحد في الفصل اللي كان أكتر واحد بينطق انجليزي صح لأنه ببساطة بيقلد بالظبط اللي قدامه و لسه مسمعش نطق غير مظبوط

بعد تقريباً 4 حصص كنا خلاص بقينا اصحاب و بعد الدرس و الأغنية و اللعبة بقينا بنقعد ندردش

في يوم جالي أكرم ولد صغير 8 سنين زعلان و بيعيط, الولد ده مصيبة أصلا في منتهى الشقاوة و العنف و الذكاء, سألته ايه المشكلة و حكالي ” انا و أمي و أبويا و 4 أخوات عايشين في بير سلم العمارة اللي أبويا بوابها, في يوم في كلبة جت ولدت كلاب صغيرة كتير ف أخدهم عندنا في البيت و كنت بخيبهم من أمي عشان هتمشيهم و بحطلهم عيش ياكلوا, قوم صحيت الصبح يوم ملقتهمش و عرفت أن أمي ربطتهم في حجر و رميتهم في الترعة و غرقوا” بصيت لوشه اللي الدموع سيحت جزء من الطين الملزق عليه و وقفت متنحة,” دكتور سبوك بتاع علم نفس الأطفال بيقول أنه الطفل الصغير لمى بيجيلوا حيوان أليف بيتعلم المسؤلية و الحنان و بيتعلم أنه يراعي المخلوقات اللي أصغر منه ولمى الحيوان بيجراله حاجة بيتعلم معنى الخسارة” أم الواد غرقت الكلاب, و الواد اللي كان كل حصة لازم أشيله من فوق واحد تاني بيبطحه مش مهتم أوي بنظريات دكتور سبوك , خسارة أيه؟ هو مفيش غير الخسارة!مفيش حاجة بتحصل غيرها

وقفت أدور على حاجة أقولها, مصدومة من القساوة اللي هو المفروض يتعود عليها, و مصدومة من جهلي لأني معرفهاش أو مشفتهاش قبل كدة بالطريقة دي و اتكسفت من عبطي,

 

 أقول ايه؟لازم أقول حاجة بسرعة؟

” الكلاب الصغيرة أكيد في مكان أحسن, و بتاكل و بتلعب”

أيه؟ أيه اللي أنا قلته ده, مكان أحسن أيه و زفت ايه؟ الكلاب الصغيرة فقاع  الترعة ميتين

في الأوقات دي بحس أد ايه صعب أن الأنسان يكون من غير أيمان بحاجة تشيل حبة من همه

كدبت على الواد الصغير لأني معرفتش اقوله ايه, و واسيته بكدبة “المكان الأفضل” قلتها بسرعة و من غير تفكير قوي يعني, قلتهالأني أنا نفسي بتمنى أصدقها….

يعني كان المفروض أقوله و هي أمك لاقية تأكلكم لمى هتجبلها كلاب صغيرة تأكلهم ؟ أو معلش يابني أنت لسة مشفتش حاجة؟

كنت خابفة عليه لأنه صغير , يعني صعب أوي من هو صغير كدة ميفكرش أنه مفيش حد هيخدله حقه من الدنيا الوحشة دي؟ مفيش حد هيوقف المعاناه دي غيره هو لو قدر! و اللي بيفكر أن فيه مكان تاني مفيهوش معاناه يبقى عبيط. و الأغلب أني أنا اللي كنت خايفة

الأطفال دول كانوا سبب خروجي من أزمة و لسة مبهورة بقوتهم و تماسكهم و مستعدة أفضل أتعلم منهم على طول

19 responses to “عن الأطفال والمكان الأحسن

  1. يااه
    علامات الاستفهام اللى بنبقى عاجزين قدامها
    اطفال نفسنا نحميهم
    بس لازم يشوفوا و يقاسوا و يكبروا

    فى نفس الوقت اكتر حاجه بتعينا و تقويينا طفل بنقدمله حاجه
    و موجود يدفينا

    فكرتينى بايام اطفال رساله
    لغايه دلوقتى باحلم باليوه اللى نورا حتتخرج فيه و مها و هناء يكبروا
    وتهانى و طاقيه الشيف
    و هدى و هى بتعملى و تاكللى رز باللبن مالوش وجود


  2. هو في ازمة ان اغلبية ردود الأفعال يا عيني يا حرام يا خساره الخ
    شوف يا عم
    الطبيعه انالطفل المصري بيفقد براءته وهو بيتعلم النطق انتي بتقولي في المنيب ؟ وبير سلم ؟
    الولد دا على الاقل شاف اكتر من 5 عركات احداهما بالأسلحه البيضاء وعلى الاقل حادثه او اتنين انتهاك جنسي كامله يا اما بين ابوه وامه يا حد من اخواته وغريب او اخواته واخواته
    العيال في السن دا بتربط الكلاب بحبل وتفضل تطوح بيها وتلف لحد ما الكلب ما يتخنق او القطه تموت
    الولد والبنت بياخدوا ضرب ماخدهوش حمار في مطلع او حرامي في مولد من اب او ام حانقين غاضبين مقموعين عاجزين (ماديا وجنسياونفسيا )وبيطلعوا كلى مشاكلهم ومتاعبهم وعجزهم في اطفالهم اللي بالتالي الطفل بيطلعه في اي حاجه تانيه
    (اخ او اخت اصغر ولد معاه في الفصل المدرسة الشارع الجامع الكنيسه الخ )
    عمي دا كله في مجتمعنا او على الاقل في المجتمع اللي انا احتكيت بيه فتره من عمري طبيعي جدا ومافيهوش اي نوع من الشذوذ وعشان محدش يدخل كما الطبيعي يقول يعني ايه عادي وحنسكت على العادي والخ اقوله طيزك حمرا ولو تعرف تعمل حاجه اعملها وبلاش طنطنه

  3. لأولا أحيى قطر الندا على هذا الموضوع الشيق
    ثانياً كلام مالك مضبوط و أنا أصدق أننا عايزين نعلم و نربى الأهالى أولاً و لكن أنا لا أنكر أن المدرسة أ الكتاب أو أى حتة بيروحها أى عيل صغير يتأثر فيه خاصة لو وجد مثل أعلى
    حاولى تكونى مثلهم الأعلى لأن ده حيغير كتير فيهم
    ×الليهم يزوقوا الفصل و ينظفوه و معلش هاتى على حسابك شاليتين زرع و هم من نفسهم حيتدوا ينظفوا

  4. I don’t know what to say.
    A lot of times kids ask you something and you become totally speechless. Sometimes you can’t help your tears in situations like this. No doubt that each and every one of us contribute to the killing of their innocense at that age, and the worst is yet to come when they grow up.

    But thank you for being the comfort they can’t find at their own homes.

  5. كبير المتشردين

    مش هتريق المرة دي بجد رغم اني اول ما ابتديت اكتب كنت ناوي اتريق يمكن انا اسمي كبير المتشردين ويمكن معشتش الكلام ده ويمكن كنت محظوظ فعلا بس تعاملت لفترات طويلة مع منظمات العمل المدني ونزلت اعمل دراسات وابحاث كتير علي الطلاب المصرين في مراحل ما قبل التعليم الثانوي الحاجات الي بتقوليها احسن الف مرة من حال اغلب المدارس وحال اكتر الطلاب يعني نقدر نقول ان 80 في المية اسوء من كده ده بالنسبة للموضوع اما بالنسبة ليكي فأنا مدين ليكي باعتذار اني في يوم من الايام كتبت كومنت في في احد المدونات وهاجمتك انا مغلطتش بس انتقدت اسلوب معين في الكتابة وخصوصا موضوع التحرش علي صفحات المدونات بس انا كنت غلطان في نقدي ليكي لاني كنت معتقد حاجة والواقع حاجة تانية خالص وبكرر اعتذاري

  6. مالك:
    موافقاك أن أكيد هو شاف و هيشوف أوحش من كدة
    بس مكنتش دي نقطتي!!أنا كنت بتكلم على أن أنا كدبت عشان ملقتش حاجة أقولها, و أن الموضوع أكيد صعب جداً من غير أيمان بمكان أحسن

  7. و أنا أبحثُ كَعادتى
    عن ذاتِ الحُب القابِع فى نفوسٍ أعرِفها
    و عن حبٍ جديدٍ أكتشفه فى نفوسٍ لا أعرفها
    أجد دائماً ما يحيِّرنى,
    هنالك دائماَ حسابات عقلانية و حواجز مُصْطَنَعَة
    تُقَوِّض حريةَ المشاعرِ التى تَتُوق دائماَ لحرية
    فهذه الحريةُ هى من صلبِ طبيعتِها
    و رغماَ عن هذا الغبارِ الكثيف الذى يحاول المُدَاراةَ على المشاعر
    إلا أنها تسعى دائماَ للتواصل
    و لكن الحدودَ قائمةٌ ما تزال
    تغتصبها المثاليةُ
    لنتركَ ذواتِنا لتخطىء
    فلا حقائق بلا أخطاء

    مازلت أبحث,
    و لكننى وجدت حقيقةً صريحةً منيرةً لا يشوبها تَغْريب,
    حقيقةً تحيرنى كسحرٍ لا أدرى سوى أن أنْذَهِلَ أمامَ قدرتِه الطاغيةِ.
    همُ الصِّغار,
    يَحْتَكِرون طاقةً الحبِ الحقِّ,
    و بذلك يحتلون بقلوبنا المكانَ الأصلىَ, و يختارون منا من يُحِبُّون أو لا يحبون.
    همُ الأقدر على اكتشافِ الصدقَ,
    نخاف أعينهم,
    فهى كاشفة .
    يملأون اليومَ بهجةً,
    و ذكاءٌ يتملكنى حين يقترب منى طفلٌ ليمسكَ بيدى و كأنه يَعبُر بى حواجز الإحباطِ لعالمٍ لا يملأه غير سعادة, و حبٍ حقيقىٍ دائمٍ, لا رغبات وراءه ,
    ثقةٌ لا حدود لها, طفلٌ يحبنًى ( يا له من كَنْز ) .
    لا مجال للزيف, هنا الألوان صريحة .
    لا مجال للغربة , فهنا الزمن و المكان مِلكٌ للحب.
    لا مجال سوى لريحِ السحرِ الحبيبةِ التى تملأ النفسَ بأجملِ ما فى الإنسانيةِ.

  8. Ahmad sun
    ,
    what is “Hell itself”? i would appreciate it if u explained.

  9. لا أحب أن أشرح ما هو مشروح
    ولا أحب أن أحدث من لا يسمع
    ولكن مع جمال اللحن الحزين المعزوف هنا، فان التعليقات أثارتني

    ahmed sun
    لا أعتقد أن قطر الندى كانت تسأل عن الترجمة، لذا فعندما تترجم كلامك وتقول (ستكون حياتك هي الجحيم بعينه) فانني أعتقد انك لم تجب عن السؤال
    وحديثك عن الالحاد وغيره قد يكون جميلا ولكن ليس موضعه هنا ان لم تجب عن السؤال
    فاسمح لي ان اتجاسر واتسائل وما هو الجحيم بعينه

  10. أحمد صن؟ ليه بقى هتبقى “وقعتي مطينة بطين”؟

  11. ماعرفش اسفسط والله
    واضح ولا اسفسط تاني؟

    !!!!!
    عبارتان تفصل بينهما بضعة كلمات، وإحداهما مصحوبة بقسم، وأخرى تتكرر بعد عدة تعليقات
    ان لم تكن تلك سفسطة فبلاشك تفتح الباب أمام مئات التعليقات السفسطائية

    ولكن …. ما علينا، نعود للسؤال الأصلي حتى لا نتوه
    your life will be hell
    ما هو الجحيم الذي كنت تنبئنا به؟
    والذي هو الجحيم بعينه كما أوضحت

    قطر الندى:
    ياريت بلاش نسرق من بعض التهديدات والألقاب
    أنا المرشح للوقعة المطينة بطين

  12. قطر الندى
    أعتذر مرة ثانية على افساد اللحن الجميل ، بهذا العبث

  13. أحمد صن,
    في الأول أحب أوضح أن في كل بوست أنا بفتح صفحة جديدة و بحاول أسمع كلام الناس من غير أفكار مسبقة (يعني لو أنت مثلاً كنت قلت حاجة معجبتنيش قبل كدة لسه برضو هشوف اللي بتكتبه) طريقة السخرية و بعت التعليق الواحد على 15 مرة دي طريقة سخيفة و مشتتة جداً ده لو أنت عنك أستعداد حقيقي للنقاش مش بس جاي تقولي أنا هروح الجنو ولا النار.
    أما عن موضوع المكان الأحسن فأنا فعلا مش مؤمنة بوجود مكان أحسن و شايفة أن دي كدبة و حجة مريحة . بس في نفس الوقت أنا مقتنعة أن في المقابل الواحد بيحاول يغير مكانه لمكان أحسن مش يستنى و يتمنى و يستحمل و ينتظر أن القوى العليا تجزيه بالمكان الأحسن الخ
    و اللي حاولت أعبر عنه هو أني شايفة أن الموضوع ده في منتهى الصعوبة و سعات كتير بأقف عاجزة و بتمني أني أكون من المصدقين في ده لأن الحجات هتبقى أسهل بكتير. و في حياة المسحوقين المداسين بالجزم زي الأطفال دول بتبفى فكرة المكان الأحسن دي فكرة رومانسية ممكن تصبرهم و لكني برده بعترف أني عملت حاجة أنا مش موافقه عليها و قلت كلام أنا مش مصدقة فيه.أرجو أن تكون فكرتي وضحت

  14. seems to be a very interesting experience. Heart breaking sometimes but very rich

  15. safsata على فكره يا اخ
    كلامك مستفز اوى بجد
    و بجد كمان لو عندك كلام عديل تأولوا اتفضل و لو كلامك هيبأى زى الى فات…… يبقى بلاش احسن
    plzzzzzzzzzzzzz و ارحمنا

  16. هم بيروحوا مدارس و بيشتغلوا في ورش و خدامين الخ , بس للأسف المدارس سيئة للغاية و مثال ان التلاميذ اللي كانوا في 3 اعدادي (يعني بقالهم 5 سنين على الأقل باخدوا انجليزي) كانوا مش عارفين الأبجدية الأنجليزية
    فالمركز بيعلم (زي دروس تقوية) و كمان بيدي حجات من نوع رسم و موسيقى الخ

  17. ممتاز والله
    معلش سؤال تاني أنا عارف اني أثقلت عليك
    المركز ده فري ولا مصروفات؟
    حكومي يعني ولا معونه أمريكيه ولا جمعيه أهليه؟

  18. جمعية اهلية

  19. and u teach kids too?
    To spoil them I assume?
    or to spread ur ideas among them hhhhh?
    hhhhh
    thats ridiculous!

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s