كائنات فضائية تزور بورسعيد مدينة الأبطال

قررنا نروح بورسعيد، دالوقتي احنا متجوزين ومعانا الورقة اللي الناس عايزاها . أخيراً هنقدر نسافر حته تانية غير شواطئ سينا اللي بقت ملجأ لكل اتنين حبيبة مش لاقيين مكان تاني يلمهم.

ابتديت أدور على مكان للاقامة على الانترنت وفي دليل السياح الشهير Lonely Planet لاقيت أماكن كتيرة ولن كلها مليانة تماماً لغايط اما أخيراً لاقيت مكان في الفندق العظيم ميريلاند مكان بسيط في وسط البلد وسعر الغرفة المزدوجة 50 جنيه رحت قلت يا بت يا قطورة: زي الفل مش مهم المكان يبقى غالي ودلع المهم اننا نروح نتفرج على المدينة.

وصلنا مدينة بورسعيد انا وهو وقت صلاة الجمعة، أولا أنا في حياتي ماسمعت كدة، الميكروفونات كان صوتها عالي بدرجة بشعة حتى اننا مكناش عارفين نتكلم مع بعض كأنك معدي على فرح شعبي، الجوامع ضخمة الحجم وكل جامع معلي الميكروفون على الاخر وحاجة اخر رعب وعلى رأي عزيزي الأنجليزي الحاجة الوحيدة اللي سمعناها من الخطبة كانت على “تلبس بنطلون ولا جلابية”.

المهم أنا لسة متفاءلة متحمسة ومتشمسة ومقررة اتفرج واتبسط

كنت كلمت اصحاب الفندق وحجزت معاهم أوضة بأسمي :”مدام قطورة”

وصلنا “الفندق” بعد ساعة ونص لف ولقينا الراجل صاحب الفندق موجود والبنت اللي حجزت معاها بصتلنا من فوق لتحت

قلنا مساء الخير

بصتلنا بدهشة مرعبة كأنها شايفة قدمها 2 من المريخ ومردتش السلام وسألتني بشكل مستهزئ وسخيف

هو “ده” منين” — قلتلها والله ممكن تسأليه هو واقف قدامك–راح قالها من بريطانيا– قالتلي وانت منين بقى؟ قلتلها من مصر

بنفس الدهشة والتريقة قالت لصاحب المكان: ينفع كدة؟ راح قايلنا لأ ماينفعش

قلنالهم هو ايه اللي مينفعش احنا متجوزين!!! متجوزييين!!!!

- معاكوا عقد جواز – قلنالوا اه طبعاً

ورحت مطلعة الورقة السحرية من الشنطة ، مسكها وقعد يتفرج فيها ويقراها المدة 15 دقيقة، كل كلمة في العقد كلمة كلمة وبنهم يبصلنا بصة ويطلع ضحكة.

مابين الاهانة والغيظ والتريقة على الموقف مضينا على ورق حجز الغرفة وطلعنا- اخدنا نفس عميق وضحكنا فشخ “واضح يا عزيزي ان موضوع الجواز ده مقلب واننا مش هنسلم من سكان الأرض”

بعد 10 دقايق قبل ما ننزل نتفسح حاولنا نقفل باب الأوضة اللي بالمناسبة كانت أوضة لطيفة ونضيفة ومفيهاش مشاكل غير الباب اللي مش بيقفل!! طب هنعمل ايه؟؟ نزلنا ننده للناس اللي تحت دول راحت البنت الخارقة اديتنا بصة وقالتلنا بتريقهة مش عارفين تقفلوا الباب هئ! طب تعالوا ورايا- أخدت المقتاح وقفلت الباب معرفناش نتفتحوا تاني!! يا بنتي احنا عايزين ناخد حاجتنا وعايزين نقدر نقفل ونفتح الباب براحتنا لكن الباب تربس! وهي قررت تنزل تستنى الراجل بتاع الأبواب لما يجي واحنا هنقعد نستناه لمدة ساعة! قلنالهم يا جماعة احنا مش جايين نقعد في فندقكم الجميل ويا ريت تشوفولنا حل، قالولنا “هو نظامنا كدة واللي مش عاجبة يمشي”

كنت في وسط المهزلة دي باتصل بباقي فنادق بور سعيد اللي كان معظمها مليئ بسكان الأرض الغير عشريين

لحد ملقينا أوضة في فندق غالي 5 نجوم وقررنا ان أبو أم وسط البلد على أهل مدينة الأبطال- هنروح نقعد في العز وناكل الوز وطظ في أي حاجة. رحنا كاسريين الباب المعصلج وواخدين حاجتنا وماشيين ورحنا فندق البهوات اتعاملنا زي البهوات!! “يا فندم حضرتك تأمري”

بعدها  ركبنا العبارة ورحنا زورنا بور فؤاد اللي مفيهاش غير شارعين جمال فيهم بيوت قديمة معمولة على طراز الخوجات اللي سقفه مايل اللي بتملكها هيئة قناة السويس!

طبعاً كل تمشية في الشارع بتنتهي بزفة أو بخناقة— ليه سكان المريخ ينزلوا على الأرض!! احنا فعلا ملناش حق!

ومفيش حاجة بتنفع! من ضمن ال 49 سؤال (في 15 ساعة) بتوع where are you from?

تجاهلنا شوية وردينا على شوية بان انا من مصر وهو من بريطانيا وشوية كمان باننا من باب اللوق بس هوة بيصبغ شعره وبيستخدم فير أند لافلي!! ولا فارق!!ولا بنكلة!! لسة برضو من المريخ!!

لحد واحنا مروحين- ركبنا تاكسي يوصلنا لمحطة الأتوبيس راح الرجل سألنا انتوا منين رحنا ساكتين مردناش عليه

وبعدين قبل ماننزل راح مطلع المبااااايل الحديث أبو كاميرا وقايلنا ممكن صورة؟

احنا: عايزنا نصورك؟

هو : لأ عايز أصوركوا

أنا: أنا عايزة افهم هو احنا كائنات فضائية

قالي وهو بيفرجني على موبايله صورة: هاا هااا لا بس ولا مؤاخذة اصل أنا بحب اخد صور تذكارية للزباين

يا ترى هي شبهي ولا شبهه؟

About these ads

10 responses to “كائنات فضائية تزور بورسعيد مدينة الأبطال

  1. that’s why i hate visiting my hometown :P

    that and it being a very boring place. i only visit for work/family stuff nowadays.

  2. Welcome to Egypt.

    Was talking to a friend of mine about marrying a non-Egyptian, and after a long discussion we agreed that this can lead to a happy life if all your contacts are either foreigners or open-minded people. Else, don’t live in Egypt.

    Sad but true.

  3. :)
    مفكعتيش شخره؟ ممضيتيش على احا مع بتوع الفندق
    سيبتوهم كدا ومشيتي؟
    ايه الادب والاخلاق دول,جولك منين يابنت؟ولا لازم يبقى لابسين ميري عشان تعرفي تربيهم؟

  4. هاها أنا لقيت البلوج بتاعك بالصدفة وبعدين ابتديت اقرأ واكتشفت انى لسة سامعة القصة دى منك انتى شخصيا امبارح… مسخرة :)

  5. ElGohary: yes married a non-egyptian or marrying someone from a different religion or marrying a dwarf or marrying a very dark person, or being dark yourself or having a pony tail or being unveiled and or or and etc.

    MaLeK: لازم اعترف بان انا كنت مصدومة ومندهشة لاني كان عندي صورة ساذجة جدا عن الزيارة دي
    أخدوني على عغافلة يا زميل مكنتش مستعدة- يعني زي ماتقول كدة كنت نازلة أجازة ومش في بالي مشاكل

    Mons: Ahlan Ahlan

  6. ايه يا هبله انتي انتي بتسخري بعقول الناس اللي في الموقع احب اعرفك ان انا من بورسعيد
    ……. اولا ساعه ونص لف طب ازاي ديه بورسعيد كلها علي بعضها تتلف بالرجل في ساعه زمن …… ثانيا مفيش اصلا فندق هنا بالاسم دا ….. ثالثا ميكروفونات ايه اللي بتتكلمي عنها كل محافظات مصر كدا انتي شايفانا هبل ما احنا بنسافر وبنروح وبنيجي وكل المحافظات بتفتح مكروفونات …. ثالثا جوامع ايه اللي ضخمه هما كلهم علي بعض مسجدين في بورسعيد اللي ضخمين وواحد في بورفؤاد واكيد يعني لما اقول مسجد ضخم في بورسعيد مش هيكون اكبر من المسجد النور او مسجد الفتح اللي في مصر …….ز واللي مش مصدق ينزل بورسعيد واهلا وسهلا بيه وافرجو علي قطعه من اوروبا ( باريس مصر

  7. ده حطت لينك بالمكان يا حمار

  8. يعني انتي معترفة انك كنتي بتروحي معاه أماكن للحبيبة من غير زواج؟ أمال ايه بقي الأخلاق اللي كانت بتنقط منك وانمتي بتتكلمي عن الانهيار في القيم والتحرش ومش عارف ايه؟
    اذا كنتي بتستهزأي بقيم البلاد اللي انتي بتعيشي فيها يبقي كان لازم تتوقعي الترش والضرب بالجزم كمان لأنه مش كل الناس ممكن تتحمل الاستفزاز ويكون لها نفس رد الفعل.

  9. حسام حسن معيط

    احنا فتحين النتنتثقف ولا نسمع كلام واحدة عقلها تعبان وتتكلم على شعب بورسعيد الناسل بطريقه دى
    احنا بفتح مواقع زى البنتاجون وكتبه الكونجرس 0000الخ مشفتش حد مختل عقليا بيضيع وقته ووقت غيرة بالطريقه دى
    عموما الامم ما هى الا أخلاق ومواقف!!!!

  10. لول بصى مش قادرة انا طبعا مقدرة شعورك جدا لأن للأسف انا مضطرة اقعد فى بورسعيد الفترة دى , وطبعا من غير الشاب الانجليزى لول او من غير اى حاجة انا من المريخ فعلا وكرهت نفسى وكرهت حياتى وقررت اخلص شغلى من البيت لحد ما امشى , مشكلة بورسعيد الناس المحدودة فى الفكر والثقافة وتعيشى وتاخدى غيرها

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s